我地又再次照相蘋果，無計啦，我地係雙料冠軍，勁呀！大家可以係尋日 (19/03) 係李八方既《隔牆有耳》：〈兄弟定黃金　你有得揀〉。

好開心，我地辛苦左大半年既努力，今日 (18/03) 終於得到成果，連奪青協既「我最喜愛打氣及宣傳短片大獎」同「營『宵』有道奬勵計劃大奬」，成為雙料冠軍！得奬既時候，我地由心叫出－－「得左」！

能夠得到呢兩個榮譽，必先多謝年宵前、年宵期間既義工，多謝你地既幫手、多謝你地既辛勞，冇左你地，我地個攤位係唔可以 Run 得 Smooth！之後，就係買過我地產品既顧客、投過我地神聖一票既朋友，多謝你地既頂力支持！當然，仲有青協各位導師既意見、批評、提點，令我地了解產品既不足，從而我地可以做出相應既措施，先可以「反敗為勝」。或許，不斷從失敗中學習、不斷從逆境絕處逢生，就係我地成功既元素之一。除此之外，我地要多謝 ATV 既《時事追擊》組為我地既年宵做一個紀錄，令我地多左好多集體回憶，Moon、豪哥多謝你地；多謝 Shell 贊助青協，你地公司支持令我地呢班年青人為將來既創業打一支強心針；多謝青協總幹事王易鳴同港交所主席夏佳理，來我地個攤位打氣；多謝田北俊議員頒獎俾我地，同分享左好多創業既意見俾我地！最後，當然唔可以唔多謝屋企既撐住，同各位 Partners 既互相鼓勵！多謝晒！衷心多謝你地支持，有今日既成功並非只係我地十一個股東既血汗，仲有你地背後既支持、提點、撐住，再次多謝你地！

諗返第一日開會既情形，就好似係尋日既事情咁，但唔經唔覺今年有過年宵既活動已經完滿結束。雖然並冇完全達到 50% 既回報，但我地得到既野俾呢 50% 更多，學左好多野，見左好多野，同時亦加深左我地呢 Team 人了解、認識，果種滿足感俾賺錢更加開心。呢段日子，我地好珍惜，會係我地全部人既集體回憶！

贏左比賽當然有去慶功，好耐冇玩得開心啦！辛苦係值得！遲 D 我地會 Post D 相出來，大家密切期待。

引伸閱讀：
年宵相集 (24.02.2007)
遲來的嗚謝 (24.02.2007)
趁熱鬧寫下野 (23.02.2007)
鳴謝編 (22.02.2007)
我最喜愛打氣及宣傳短片大獎 (18.02.2007)
恭喜發財 (18.02.2007)
ATV 《時事追擊》之「過新年」 (17.02.2007)
RTHK《公民社會》 (12.02.2007)
幾時開始呢？ (09.02.2007)
絕密公開！ (09.02.2007)
年宵點解咁好玩 (08.02.2007)

尋日，我地一行六人到左荃灣既青協，為營「宵」有道獎勵計劃做一簡單既 Interview，由於準備充足，In 完之後大家都感覺不錯。下星期就知道結果啦！我地相信我地係有機會得到大獎既！

之後，我地就去左嘉年華，玩番下，畢竟年宵過後，我地都冇真正咁玩下、Hea 下。

不知是否之前勞碌了幾個月, 所以一完成所有事之後, 成個人就好似散了一樣, 呢幾日都係休息...休息...休息, 我把聲到今日(年初六)先叫做回覆正常, 所以咁遲先上來多謝大家, 希望各人體諒.

多謝多謝多謝...........真係要多謝好多人呀........除了多謝我們11個Partners之外, 仲要多謝阿呆, Mika, 波波, 其他Partners的朋友們, ATV的豪哥&Moon.......好多好多來自不同界別的VIP.........多謝你們的支持, 體諒. Thank you so much

今年做得唔好的地方, 希望妳們見諒........等我們呀, 來年我們會做得更好的.

--
Polly

見到咁多人寫野，自己都好想寫番篇關於年宵既文。諗就諗左好耐，但到打既時候又唔知要寫 D 乜，等我組織一下先！

係未入正題之前，有幾個人好想多謝－－
阿呆同 Mika，你地雖然係義工，但差唔到晚晚都來，好多謝你地撐場，辛苦晒；
Thomas，好多謝你以友情價同咁短時間整好 20 件 T-shirts，Thank you；
S 集團既同事，多謝你地買左我地既產品，尤其你地咁樂意幫我推銷，多謝你地；
屋企人，做年宵期間人好燥又好支力，多謝你地既體諒；
一班好 Partners，好開心同你地合作，多謝你地原諒我既 $128 錯誤，下次我會醒 D！

其實，今次我想講點解會搞年宵。可能因為睇得 CK 同揸沽個 Blogs，俾佢地荼毒左，於是幻想一下自己做老闆。咁岩何生又叫我一齊玩，就係咁就應承左佢啦！開頭既時候都係觀望下，搞搞下又好開心，D Design 又得（事實上我地自家 Design 既 Products 又好賣得），所以愈近年宵就愈興奮，決定做好呢個攤位！

進駐維園後，見到有人中意我地既 Products 仲開心－－未開市既時候就已經有人來賣我地既「豬耳仔」，好有滿足感；年初二，個侄仔真係囉住隻「發財矇豬豬」來拜年，仲幫佢改左名叫左「甘尚豬」，講係甘家既新成員，果時既高興指數達十級！原來我地既 Design 真係咁掂！

而家年宵完左，睇返何生 Send 出來既財政報告，又諗下呢幾日發生左既事，檢討一下得失，如果由頭再 Plan 過會點呢？有咩可以做好 D 呢？要係度野，可以寫好長，下次有機會先再寫。反而想係呢度講俾有興趣搞年宵既人知，唔好以為年宵一定賺大錢，今年都係得「珍寶珠」賺左廿幾萬，其他都係旺丁唔旺財。想賺大錢搵快錢，買幾箱果汁好過啦（都傻一日可以升 66%，可惜我抽唔中）！搞年宵好玩在於過程，賺錢係 Bonus！

最後想提一提未投票俾 8 號既朋友仔，請幫幫忙到以下網址投票：

http://www.yen.org.hk/newyen/YEN/vote.htm

Thanks you!

--
Raymond

其實之前何老闆發表完我o地的年宵點黎之後，我都想借此機會多謝一班朋友仔。雖然遲o左d，就當我同大家拜番o個年啦！

年宵攤位o既構思的確唔係今年o既事，其實早係幾年前，已經有班朋友仔成全我d crazy諗法，係街邊賣冰糖士多啤梨，因此我今年見到咁多檔賣冰糖士多啤梨，心到都好想大叫"抄橋"。之後，就同何老闆一班同學仔學人做小販推車仔賣剪紙。今年終於可以一嘗大場o既滋味，的確好有氣紛。當然都真係好多謝一班"拍檔"o既努力，令到我o地真係有做好呢個booth。

各位朋友仔，拍檔仔，友情顧客仔，"多謝多謝多謝多謝多謝多謝多謝多謝！多謝大家每次都抽出你o地保貴o既時間同金錢去成就我o地呢o個小小o既夢想！"

係呢度我祝大家「"豬"事順利，夢想成真！」

~Tiffany

年宵完左，但我o地呢個 Pig Project 未完，而家正式進行第二擊，就係青協主辦－－營「宵」有道獎勵計劃。請各位係 28/02 之前，到以下o既網址投 8 號一票，支持我o地角逐「我最喜愛打氣及宣傳短片大獎」:

http://www.yen.org.hk/newyen/YEN/vote.htm

你o既神聖一票足以改寫我o地命運！請投 8 號一票，多謝支持！！！