諗起來，如果要追溯返整個年宵活動o既經過應該係舊年 6 月開始講起。記得當時，我去左長洲睇完搶包山之後，見到賣「包」o既檔口咁好生意，個個都囉住一個二個「包」返出來，覺得自己可以試o下。於是，第一時間就搵 Tiffany 傾o下搞年宵o既可能性。果時，我o地就諗左一 D 有趣o既「搶包山」產品。雖然最終都無實行，因為大家覺得年宵果時 D 客都未必對「包山」有興趣。

講起 Tiffany，點解第一個會搵佢呢？其實我同佢都唔係第一次搞年宵，兩年前同一 D 大學同學仔一齊賣過剪紙、揮春。當時我o地冇投年宵市場o既檔位，只係夜晚係花園街借兩邊小販o既鋪位來搞年宵。由於近旺角年宵市場，所以都幾人頭湧湧架！最後當然有賺錢，不過成個過程都幾辛苦，成日要做「苦力」咁，Budget 又 Tight，賣o既又係現貨，始終都唔夠過癮。我o地果時就講：「有朝一日，我o地要衝出街頭，殺入維園，有大玩大！」

唔經唔覺到左 10 月，我o地就正式開始組 Team 搞年宵，最初得我、Tiffany 同阿 Sui，後來叫埋 Raymond、Iris、Ivan 同 Landise 來「反」。基本隊形都有啦！第一次係維園搞，緊係有好多o野一無所知，例如參加人數、攤位預算、集資額、產品數量等等。於是乎，我o地就咁不斷搜集有關資料，希望減少出錯，做到最好。

其實一開始，我o地產品走o既路線係多元化同有特色創意（PS：其實我o地當時都諗過吹氣煲呔，不過無實行姐）。之後，組員越來越多，大家覺得呢 D 產品風險都幾大（唔係太複雜，就係題材太敏感），所以漸漸走左另一條路線，就係而家主力o既豬年產品，雖然預計競爭會好大，但係我o地好有信心會做得好，因為我o地諗到極具創意o既「皇牌」，知道一定掂！

最後，大家都同意集中火力做好呢樣「皇牌」，實行係豬年「Pig」Money！

-- Kalian